利物浦开季3场不胜，输畀死对头曼联更加面目无光，被誉为「世界最佳中坚」嘅华基尔云迪积克(VVD)今场表现差劲，曼联开纪录嘅入波，VVD竟然全程做「企鹅」变最近观众，睇住查顿辛祖轻松射入，连占士米拿都忍唔住即场捉住佢丧闹！
查顿辛祖开纪录一球，佢喺禁区攞波、转身、「吸」过占士米拿飞铲、校炮再射入，VVD全程企喺小禁区睇波，大批网民留言话：「呢啲系平时马古尼做嘅嘢」，估唔到VVD都有得出卖。占士米拿睇见都火滚，笃住VVD心口狂闹：「你同我冲出去挡X住佢！」
利物浦名宿加历查赛後亦炮轰VVD：「我知道佢唔系嗰种下下瞓身嘅中坚，但有时你都要豁出去，铲波又去、成个人瞓出去又好，总之唔可能斋企喺度。」前曼联队长坚尼就话：「VVD今季表现都好差，呢球波佢系应该冲出去，但佢两只脚郁都冇郁过。」
