周六（20日）晚英超头场，热刺凭王牌哈利卡尼一箭定江山，喺主场以1:0力克狼队，开季3仗联赛2胜1和，哈神更以185球荣升为英超单队入球最多嘅球员，双喜临门。
热刺有新兵翼衞比列锡首度担正，虽然佢哋有主场之利，但作客嘅狼队上半场射门更多，啱啱破球队转会费纪录加盟嘅中场马菲奥斯纽尼斯表现活跃，包括一次无人看管下入楔头槌仅仅斜出，几乎先开纪录，直到完半场前热刺先有中龙攻门，比列锡传中畀哈利卡尼劲顶被救出，半场互交白卷。
热刺球员可能畀主帅干地闹醒，下半场表现明显有改善，哈利卡尼再次摄到靓位飞顶，可惜中楣弹出，冇耐哈神长传畀好拍档孙兴民势成单刀，但佢控甩脚真嘥料，去到64分钟比列锡头槌二传，哈神伏兵门前顶入先开纪录，亦系佢为热刺攻入嘅第185个英超入波，打破曼城名将阿古路喺英超为单一球队入球最多纪录，最终热刺小胜1粒，全取3分。
