曼城中场贝拿度施华前途再出现变化，曾盛传巴塞隆拿计划收购呢位28岁葡萄牙国脚，但因为财政问题，迟迟未成事，英国《每日邮报》指法甲劲旅巴黎圣日耳门(PSG)趁机截胡，提出以5,900万镑买「B施」。
虽然巴黎圣日耳门球星如云，但新帅加迪亚认为球队有需要增兵，提升实力，先至有机会问鼎欧联冠军宝座。PSG锋线上已经有美斯、尼马、基安利麦巴比，所以加迪亚最想签入中场，并睇中贝拿度施华。
其实贝拿度施华对法甲并唔陌生，因为佢2017年加盟曼城之前，曾经效力过摩纳哥3季，其後以5,000万欧元转投「蓝月亮」，协助球队捧过4次英超、4次英联盃及1次英足盃冠军，佢仲有3年合约在身。
贝拿度施华上季披甲50次入13球，但今季2场英超都只系後备上阵，加上佢早前表示，曼城唔会强留任何球员，似乎暗示有离队嘅可能性。
