英超开季连续2场失分嘅利物浦，「双红会」前出现突发事件，据报中场拿比基达要求转会，或喺今个转会窗重返RB莱比锡，令原本已经闹中场荒嘅利物浦大失预算。消息指「红军」已紧急物色替补人选，白礼顿中场新星摩西斯卡些度获高普垂青，或成利物浦救星。
德国《天空体育》报道，畿内亚国脚拿比基达对自己喺利物浦嘅发展并唔满意，同球会嘅续约谈判亦已停止，呢位27岁球星更希望喺今个夏天转会。由於拿比基达依家张合约到季尾就完结，利物浦唔想人财两失嘅话，一系就说服佢续约、一系就立即将佢卖走，《每日邮报》指前球会RB莱比锡已表明有意回购拿比基达。
利物浦本身中场人脚唔算充足，而且堤亚高艾简达拿开咧重伤，加入阿历士张伯伦、居迪斯锺斯嘅「十字军」名单，兵源更加捉襟见肘。虽然利物浦曾讲明今夏转会工作已经结束，但高普喺月初就曾暗示有突发事件，将会再次出手：「我哋嘅转会已经结束，如果冇人离队或者严重受伤嘅话......」
利物浦原本打算明年全力收购多蒙特中场祖迪比宁咸，但拿比基达潜在转会令球队重新部署，据《90min》报道，「红军」睇中白礼顿新星摩西斯卡些度，呢位20岁厄瓜多尔国脚有唔少豪门垂青，白礼顿视佢嘅价值同宾韦特、古古列拿相约，意味叫价可能达5,000万镑以上，而效力锡菲联嘅挪威中场辛达贝治就系Plan B，佢嘅转会费只需1,500万镑左右。
