利物浦英超争霸再遇挫折，周二(16日)凌晨主场迎战水晶宫只能1比1逼和对手，连续2场失分而回，开季2轮已经落後争标死敌曼城4分。利物浦贵价前锋达云纽尼斯惨成罪人，佢喺下半场失控用头撞人直接食红牌，好在路尔斯戴亚斯贡献1扭5金球，为利物浦抢番1分。
利物浦有8,500万镑神锋达云纽尼斯首度担正，但晏菲路首演变成噩梦，上半场2次黄金机会都浪费，水晶宫就靠韦费特沙夏一次反击入波，半场意外领先1比0。利物浦下半场继续控制战局，但57分钟达云纽尼斯被佐基姆安达臣推，竟然沉唔住气用头顶向对方报复，难逃直接红牌命运。
踢少个嘅「红军」4分钟後有神来之笔，路尔斯戴亚斯左路个人突破，人丛中扭过5名水晶宫球员後喺禁区顶轰出世界波，为主队追成1比1平手。利物浦之後继续进攻，可惜冇办法撕破水晶宫防线，结果连续第2场和波失分。
利物浦领队高普赛後表示：「纽尼斯不断被挑衅，但系佢畀出错嘅反应，呢张红牌系无可否认，纽尼斯要学精，可惜佢嚟紧几场都冇得上阵。佐基姆安达臣想有呢个结果，佢成功咗，我之後会同纽尼斯好好倾下。」达云纽尼斯食红牌，意味佢会错过下轮对曼联嘅「双红会」。
