热刺对车路士嘅火爆大战争议持续，基斯甸罗美路粗暴扯古古列拿头发一幕更加系焦点，据英国《天空体报》报道，英足总将唔会追罚呢位阿根廷「茅王」，更讽刺嘅系足球条例并冇列明「唔准扯头发」，令基斯甸罗美路可以横行无忌。
车路士领队杜曹赛後批评：「足球几时开始容许扯头发？」不过《天空体报》报道指，足球并冇明文规定「唔准扯头发」，只能靠球证判断动作系咪属於「暴力行为」，而基斯甸罗美路今次扯头发，经过VAR审视後就认为「冇问题」。由於VAR曾经介入，所以英足总亦冇权追罚呢位热刺中坚。
由於条例嘅不确定，英超过去都有唔少扯头发场面，2016年李斯特城中坚贺夫曾经扯曼联中场费兰尼头发，费兰尼就开肘报复，结果足总事後追罚2人各停赛3场；2018年，已经剪走爆炸头嘅费兰尼，就扯阿仙奴中场古安杜斯头发，但球证同足总都冇作出行动。
基斯甸罗美路走得甩，不过热刺领队干地同车路士领队杜曹赛後「讲手」被逐，英足总就正式落案检控2人行为不检，而杜曹赛後对球证安东尼泰莱嘅批评，亦正受到调查，唔排除会对佢另外作出处分。
