曼联上场0比4输畀宾福特，身高只有1米75嘅中坚利辛度马天尼斯被指系「最大弱点」，据英国《The Athletic》报道，原来曼联早就考察过呢位阿根廷中坚，不过2位前任领队苏斯克查同兰历克都睇唔上眼，认为佢太矮唔适合踢英超，所以拒绝收购。
利辛度马天尼斯喺阿积士表现大获好评，报道指曼联球探曾经多次进行考察，不过结论系佢身型太矮，喺死球好易出事，所以苏斯克查同兰历克不约而同拒绝出手，苏斯克查更加倾向维拉利尔嘅柏奥托利斯，当然最终都系冇晒下文。直到坦哈格点名一定要签利辛度马天尼斯，曼联先至出到5,500万镑天价抢人。
宾福特前锋艾云东尼日前表示，佢哋针对利辛度马天尼斯计划好成功：「球队计划系利用我嘅制空力，尤其我今场对住身型较矮嘅中坚，所以呢个计划非常成功。老实讲马天尼斯都踢得好有侵略性，见到佢喺半场被换走，对我嚟讲都系一个成就。」
