曼联作客0比4惨负宾福特，头号罪人肯定系门将迪基亚，呢位西班牙球星开波早段2次严重犯错令球队万劫不复，佢赛後亦自知「罪孽深重」，主动要求接受《天空体育》访问，并喺直播入面独揽输波罪责。
迪基亚喺访问入面表示：「我要负番起今日嘅责任，老实讲系我累球队冇晒3分，我嘅表现非常差劲，第1个犯错之後又出现第2个错误，球队好难承受。我应该阅读球场更好，宾福特一直进行1对1逼抢，或者我唔应该传畀基斯甸艾历臣，所以我话系我累球队输波。今场踢得好差，但我哋仍然要团结，做好领队嘅要求，为身上会徽而战。」
31岁嘅迪基亚同曼联合约明年到期，近日有消息指坦哈格亦希望换人，有意喺转会窗完结前签入一位可以挑战正选位置嘅门将，提早为「接班」准备，尤其迪基亚明显未能胜任坦哈格要求嘅「清道夫」角色，经过今场比赛後，曼联买龙门嘅计划似乎要加速进行。
