上季担任曼联看守领队嘅「逼抢之父」兰历克，今夏离队转任奥地利国家队主帅後，竟然学咗尹戈尔成为另一位「方丈」，事关兰Sir日前公开表示，劝戒麾下神锋沙沙卡拉积锡，为自己前途着想，唔好加盟曼联。
曼联英超首仗输畀白礼顿後打锣搵前锋，之前搵阿拿奥杜域斟介行动已煞停，又遭「新夏兰特」施斯高拒绝，近日各媒体再爆料，曼联最新目标系史特加25岁中锋沙沙卡拉积锡。
呢位奥地利中锋身高2米，前季上阵36次攻入17球，上季大部份时间养伤，仅上阵15次，但都入咗6球，曼联如果签到佢，将可解决前锋问题。
不过兰历克却公开表示，球员为自己前途着想，切勿加盟曼联：「依家最重要系沙沙卡拉积锡能健康完成球赛，咁先可以保持最佳状态，对於佢嘅转会传闻，我觉得留喺史特加会有更好发展。」
兰Sir嘅言论似曾相识，因为同一番说话讲得最多系另一前曼联主帅尹戈尔，尹帅对於曼联当年炒佢一直耿耿於怀，传闻兰历克喺曼联半年有唔少不愉快经历，最後因为无法同坦哈格合作，连原本升任曼联顾问一职都唔捞，变成方丈。
