曼联今个夏天收购前锋计划频频触礁，由最初抢达云纽尼斯输畀利物浦，到近期收购阿拿奥杜域被博洛尼亚拒绝，球队前锋只系得番想离开嘅C朗拿度，同埋外借回归嘅安东尼马迪尔。对於曼联嘅情况，墨西哥前锋查维亚靴南迪斯日前表示，如果曼联向佢提出斟介，佢愿意唔收钱返「红魔鬼」帮手！
34岁嘅「小豌豆」依家效力洛杉矶银河，佢日前表示：「如果曼联搵我返去，我会答应，而且仲唔收人工！你知道我真系愿意咁样做，当然我都要尊重依家嘅球会(洛杉矶银河)，我决心要为球队捧冠军，未来嘅事顺其自然，要发生嘅事自然会发生。」
查维亚靴南迪斯喺2010年至2015年效力曼联，帮球队拎过2次英超冠军，佢喺2020年登陆美职，为洛杉矶银河上阵54场联赛攻入28球。
