巴塞隆拿为踢走法兰基迪庄可以去到几尽？据英国《The Athletic》同西班牙媒体报道，巴塞认为法兰基迪庄、碧基等球员同前任会长巴度美奥所签嘅合约属於违法，所有参与合约嘅人都涉及犯罪行为，球会上月已向法兰基迪庄发出律师信作出起诉警告，要求佢哋履行番原有合约。
西班牙《世界体育报》消息指，涉及违法合约嘅球员包括法兰基迪庄、碧基、达史特根同基文迪朗格勒，佢哋前季同前会长巴度美奥达成减薪续约协议，虽然即时减薪，但合约确保佢哋未来会获得比减薪数目更多嘅巨额补偿，巴塞认为当中涉及「不公平管理罪」，球会律师已经将案件提交检察部门审理，要求裁定新合约无效。
《The Athletic》报道指，巴塞喺上月15号已经向法兰基迪庄发出律师信，通知佢依家份合约嘅问题，同时警告所有参与签合嘅单位都涉嫌犯罪行为，目前未知碧基、达史特根同基文迪朗格勒有冇收到同样警告信。虽然受到曼联、车路士斟介，但法兰基迪庄目前仍坚持留队，有传佢系要拎到球会争佢嘅2,000万欧元欠薪先肯离队。
