争标大敌利物浦首仗失分，衞冕嘅曼城周一(8日)凌晨喺英超就旗开得胜，作客2比0轻取韦斯咸，新加盟嘅前锋艾宁夏兰特「地标战」即入2粒尽展身价，呢位挪威射手赛後High到直播爆粗，不过领队哥迪奥拿就大赞佢嘅态度，可以媲美球王美斯。
曼城今场虽然作客，但就控制晒战局，全场控球率高达75%，艾宁夏兰特喺前场威胁力极大，36分钟先博到12码亲自操刀射入，65分钟再接应奇云迪布尼直线，禁区内乖巧熨入。艾宁夏兰特亦成为2011年嘅阿古路後，第1个首演就入2球嘅曼城球员，「蓝月亮」最终凭呢2个入波赢2比0。
艾宁夏兰特今场本来有机会连中三元，但尾段接应根度简传中失之交臂，佢赛後表示：「呢球波我应该要入，真系好XX，但踢波就系咁。」当记者提醒佢要注意言词，艾宁夏兰特又改唔到口：「噢，对唔住，X！噢，对唔住。」
曼城领队哥迪奥拿就大赞艾宁夏兰特嘅态度：「我锺意！我有幸教过美斯，佢喺嗰种入咗2球，会想入3球，入咗3球又想入4球嘅球员，顶级前锋永远唔会满足。」呢位前锋上星期喺社区盾後被批评，哥迪奥拿亦趁机反击：「社区盾之後有人话夏兰特踢唔掂英超，依家就变成同亨利、舒利亚、C朗一样劲嘅最佳前锋。」
