曼联首仗输波，名宿围插，当然唔可以少咗名嘴加利尼维利。「加利佬」认为首仗主场输波对曼联打击好大，为今之计唯有换球员、换管理层团队，甚至班主格拉沙家族系时候卖盘先有得救。
「加利佬」指出：「白礼顿并非强队，今场败仗并唔理想，季前热身赛球队畀人好大期望，依家踢成咁真系好大打击。现时嘅情况，多数曼联球员都好熟悉，管理层亦明白发生咩事，坦哈格手上系支咩球队，佢哋需要增兵，坦哈格亦需时适应，不过相信坦哈格都睇到曼联球员嘅真实水平。」
佢又话曼联咩料，球迷心中有数：「之前闭门比赛，球员都好自在，因为冇人闹佢哋，但依家咁多球迷睇住，咁嘅表现系无法令人接受，我相信过去一年球迷都观察过呢支曼联，各个位置几乎冇变过，虽然大家都期望佢哋能够焕然一新，但实际唔系咁。」
「加利佬」开始插球员同管理层：「领队需时适应，我唔会指责佢，不过一间公司当员工对工作冇晒热诚，咁对大家都系一种折磨，不如由得员工离开。至於管理层，过去一年都无法解决问题，买唔到好球员，所有困难仍然存在，佢哋自己心知肚明。」
最後，「加利佬」讲到曼联班主，佢话：「格拉沙家族系时候要卖盘，依家系时候喇。」
