周日（7日）晚英超焦点战，曼联主帅坦哈格宁用基斯甸艾历臣装「假9」，都唔畀王牌C朗担正，搞到新一季首仗即出师不利，喺主场以1比2输畀「海鸥」白礼顿，坦帅真系自己攞嚟衰。
开咧前屡传离队嘅曼联前锋C朗，今仗只系先任後备，主帅坦哈格更将新兵中场基斯甸艾历臣改打箭头，令人意外。不过一开波右闸达洛治控波甩脚，畀白礼顿快翼李安度杜沙特窄位抽射出界，之後曼联还以颜色，先有般奴费南迪斯炒飞机，跟住佢再策动反击，可惜艾历臣快射被没收。
去到30分钟，李安度杜沙特劏穿曼联防线，韦碧克於左路横传，柏斯高哥斯近门射入，白礼顿意外地先开纪录，9分钟後轮到马治劲射，迪基亚救出不远，柏斯高哥斯执死鸡射成2比0。
易边後曼联虽然控制战局，但都冇乜板斧，坦帅惟有53分钟换入C朗救亡。65分钟般费於右路传中，C朗於中路漏顶，但远柱嘅拉舒福特射高，3分钟後达洛治於混战中攻门，阿历斯麦亚里士打却摆乌龙追番粒，但最终曼联仍然输1比2，坦帅企硬唔用C朗担正，搞到开坏个头，认真失策。
