曼城新签射手艾宁夏兰特被寄予厚望，但上仗社区盾门前失机，表现令人跌眼镜，呢位22岁挪威国脚并冇气馁，日前同英格兰传奇射手舒利亚见面，表示喺对方身上偷师，获赠英超入波秘诀，好有信心可以喺周日(7日)晚首轮英超作客射入韦斯咸大门。
舒利亚以260球成为英超史上入波最多嘅球员，艾宁夏兰特喺呢位名宿面前，变身小球迷，同对方合照「集邮」，并放上社交网话：「从佢身上获得小贴士。」
艾宁夏兰特之前效力多蒙特上阵89场入86球，入球率极高，但佢认为英超唔易踢：「球员好似表演者，每星期喺球场上演出，身为前锋必须入波，但好多事情并非可以控制，我会尝试去享受，付出百份百努力，赢出每场比赛，我系1位非常渴望入波嘅球员。」
艾宁夏兰特仲话选择离开多蒙特，系希望跳出「舒适区」，接受更大挑战，自己仍然年轻，可以效力曼城呢种大球会，一定可以令自己更加进步。至於艾宁夏兰特能否踢第1场英超就入波，大家拭目以待。
