曼联新任行政总裁李察阿诺特上场後,准备将球队由上到下进行重建,其中一个令佢最不满嘅地方,就系曼联嘅社交媒体政策。任职3年半嘅传讯部总监布绿斯喺2月宣布辞职,媒体主管宁治早前亦被加利尼维利炮轰,不过就喺李察阿诺特表达不满後,曼联twitter日前又再「濑嘢」,引嚟球迷狂轰。
曼联周日(8日)吞白礼顿4蛋,比赛几个钟头後,曼联官方twitter竟然出咗一篇文:「坦哈格嘅球队经历戏剧性下午,喺荷甲争标继续保持优势」。贴文一出即被曼迷疯狂洗版,直指曼联「无耻」咁借阿积士争冠作为惨败遮羞布,眼见球迷群情汹涌,曼联冇几耐之後就将贴文删除。
唔少愤怒球迷留言话:「官方twitter出呢则消息真系好X尴尬,唔怪得佢哋即刻删文」、「曼联嘅社交媒体团队,同真正球队一样咁唔掂」、「10年冇英超冠军、15年冇欧联冠军、6年冇拎过任何冠军,曼联个编辑觉得球迷会有兴趣知道阿积士捧盃机会?」