利物浦喺英超冠军争逐遇滑铁卢!日前杀入欧联决赛嘅利物浦,周日(8日)凌晨主场只能够1比1逼和热刺,虽然暂以得失球差压倒踢少场嘅曼城升上榜首,不过痛失2分後,领队高普表示睇唔到曼城余下比赛有失分机会,承认英超争冠大势已去。
利物浦赛前落後曼城1分,只要「蓝月亮」稍有失手,利物浦全胜即可封王,不过率先甩辘嘅竟然系利物浦,佢哋主场对热刺控制战局,华基尔云迪积克上半场曾角球顶中楣,半场互交白卷。全心打反击嘅热刺56分钟先开纪录,孙兴民接应赖恩施斯隆传中无人看管下射入。
「红军」之後换入迪亚高祖达加强锋力,去到74分钟终於有收获,路尔斯戴亚斯中路劲射,省中宾坦古亚改变方向入网,利物浦追平後球员体能下降,热刺尾段几乎再有入波,贺积查治门前无人看管下唔攻门,反而头槌二传交失,最终两队踢成1比1完场。
和波嘅结果可以话两败俱伤,利物浦失2分令曼城优势扩大,热刺亦以1分落後第4位兼踢少场嘅阿仙奴。高普赛後表示:「我都想坐喺度讲『曼城都会失分』,但问题系我睇唔到呢件事会发生。首先我哋唔好将今场失分当成丧礼,而且要继续前进,试想万一曼城真系输波,但我哋因为唔再相信(争冠)而把握唔到,结局会有几癫?4冠王从来唔易,亦系英超史上冇人做到嘅原因。」