英超英冠、前4同护级都竞争激烈,就连射手榜都有一番恶斗!目前利物浦前锋穆罕默德沙拿以22个入球排榜首,热刺前锋孙兴民对「红军」再入波後,以20球紧追,呢位南韩球星近期状态大勇疯狂入波,相反沙拿要留力应付多条战线而「减产」,令孙兴民有机可乘。
沙拿喺近7场联赛有6场「食白果」,相反孙兴民对上7场联赛狂入9球。数据显示,沙拿今季22个入球当中有5球嚟自12码,而热刺嘅12码就由哈利卡尼包办,如果撇除12码统计,孙兴民会系今季英超入波最多球员。
孙兴民今仗成为史上首位喺5大联赛入20球嘅亚洲球员,亦系继舒宁咸、奇连士文、加里夫巴利同哈利卡尼後,第5个单季入20球嘅热刺球员。对於金靴奖荣耀,孙兴民表示:「赢英超金靴奖一直系梦想,不过更加重要嘅系球队,入波梗系开心,但你唔可能一个人入波,而系需要队友嘅支援。」