今届欧联决赛队伍周四(5日)诞生,利物浦同皇家马德里将上演4年前决赛「翻版」,喺本月28日深夜争夺冠军宝座。4年前比赛途中伤出嘅穆罕默德沙拿,喺得悉皇马系对手之後,随即喺Twitter发文:「我哋仲有件事未解决」,似乎要向皇马下战书。
皇马周四(5日)喺欧联4强次回合以3比1淘汰曼城,跻身月尾喺巴黎举行嘅决赛,同「红军」争夺冠军。沙拿得悉後,随即喺Twitter发表一则写有「我哋仲有件事未解决」嘅帖文,明显表达出希望报番2018年决赛一箭之仇嘅意思。事关4年前利物浦正正以1比3不敌皇马失落冠军,而沙拿亦喺比赛途中被沙治奥拉莫斯整伤膊头,被迫退下火线,佢想藉住今届复仇亦不无道理。
沙拿早喺4强之前就表明希望喺决赛再遇皇马:「如果你问我个人意见,我会希望对番皇马,因为我哋之前输过畀佢哋,今次我想对番佢哋而且渴望赢波。」节目主持里奥费迪南听到之後就表示,欣赏沙拿嘅坦率同决心:「佢同皇马之间仲有事未解决,好明显有件事令佢决心复仇,祝佢好运!」