周五(6日)凌晨欧霸盃4强次回合，英超球会韦斯咸作客法兰克福力图大反击，不过喺早段就踢少1个情况下，以0比1再输1场，两回合合计输1比3出局，法兰克福喺决赛将会同格拉斯哥流浪争霸。韦斯咸今场输波兼输品，领队莫耶斯比赛期间企图用波省向球僮泄忿，结果换嚟红牌出场。
韦斯咸首回合落後1比2，今仗奋力反扑早段气势十足，但19分钟一次犯错就踢少个，艾朗加斯威尔将单刀嘅侯治拉跌，球证最初只出示黄牌，但VAR介入後改判红牌。法兰克福踢多个即有收获，26分钟山度士波里接应传中射入，将优势进一步扩大。
法兰克福之後开始「揼波钟」求稳阵完场，韦斯咸虽然积极作战但苦无破关之法，领队莫耶斯喺77分钟更情绪失控，佢不满法兰克福嘅球僮故意慢动作执波，竟然将个波大力向球僮方向狂抽，虽然「射术」麻麻未能命中，但球证就向佢出示红牌，最终韦斯咸再输一场出局。
延伸阅读：【罗马踢走李斯特城 摩连奴创历史变喊包】
https://bit.ly/3KU1ZjH
莫耶斯赛後就省球僮事件道歉：「赛果好失望，但我为球员表现感到极度光荣，恭喜法兰克福......我用个波踢向个球僮，呢一点我要道歉，但系佢故意细细力咁将个波碌畀我，我当时只系感到非常失望。我唔敢肯定系咪享受球证嘅执法，但肯定好享受呢个比赛。」
法兰克福喺决赛嘅对手会系格拉斯哥流浪，呢支苏超劲旅喺另一仗准决赛，主场3比1击败RB莱比锡，两回合计赢3比2晋级。决赛会喺5月18日假西班牙塞维利亚上演。
