周三(4日)凌晨英冠独脚戏,般尼茅夫凭有华人血统嘅前锋基化摩亚射入全场唯一入球,主场以1比0击败诺定咸森林,领先对手6分,提早一轮锁定前2位直接升班资格,阔别2年之後,将於下季重返英超。
今场第2位同第3位对决,非胜不可嘅诺定咸森林初段有唔少具威胁攻门,包括有1次射门中楣弹出。般尼茅夫企稳阵脚後,逐渐控制大局,并於83分钟喺禁区顶获得罚球,但中场菲腊标宁唔冇直接射门,而系斜传畀後备上阵嘅基化摩亚射入,般尼茅夫全取3分之後,将会同富咸一齐升上英超。
入波嘅基化摩亚今年1月先至由卡迪夫城加盟般尼茅夫,上阵4场入3球,效率极高,兼成为升班功臣。呢位身高1米96嘅29岁前锋有华人血统,佢嘅外祖父来自中国广东,9年前中国国家队曾经打算招揽佢入国足,但未能成事,3年前成为威尔斯国脚。
至於英冠余下1个升班席位,将会由第3至第6位球队踢附加赛决出,其中第3位诺定咸森林、第4位哈特斯菲尔德已提早获得附加赛资格。