曼联周一深夜主场大胜宾福特，赛後球队名宿坚尼，就喺《天空体育》节目拣选佢心目中嘅曼联史上最佳11人，不过当中竟然冇好友里奥费迪南、史高斯份，而现役球员就只得C朗拿度入选，唔知各位球迷又认唔认同呢？
一班《天空体育》主持喺曼联赢波後，纷纷要求坚尼拣出佢心目中嘅「红魔鬼」史上最佳11人，依名50岁球队名宿，首先喺门将位置选择舒米高，左、右两闸分别拣咗同乡艾云，以及好友加利尼维利，佢仲大赞「加利佬」属於非常好嘅队友同顶级职业球员。至於中坚位置就令坚尼相当苦恼，最终里奥费迪南意外落选，一对中坚组合由史谭夥拍巴里斯达。
至於中场方面亦有一定争议性，史高斯并无入选，坚尼反而拣咗白赖仁笠臣同恩斯，佢认为前者喺中场胆色过人，而後者则系同自己一齐战斗嘅杰出球员。两翼方面就有杰斯同碧咸，坚尼表示佢哋职业生涯，持续维持高水准表现。
最後双箭头就有基斯坦奴朗拿度同朗尼，而C朗仲成为现役中唯一一位入选球星，而「大帝」简东拿、前荷兰射手云尼斯特莱则成为沧海遗珠。
