利物浦日前为球迷带来喜讯,领队高普正式同球队续约至2026年。据英国媒体《The Athletic》透露,有3个主因驱使佢继续留队,当中一个更颇为动人,令高普就算一蚊人工都唔加,都甘愿留低希望报答球队。
「红军」领队高普近年带领球队再创高峰,包括重夺欧联同英超冠军,今季更有机会冲击4冠。据《The Athletic》报道,原本高普同太太打算喺2024年完约後,就返德国隐居过半退休生活:「喺呢段创造成功嘅时间里面,令高普思考离开利物浦後应该做啲咩,做自己想做嘅事,例如陪吓屋企人,或者去吓旅行咁。」
但由於佢哋两公婆位於德国嘅新居预料到时仲未起好,因此令高普决定推迟回德国嘅计划;此外2020年初爆发嘅新冠疫情亦令佢想延续足球时光:「疫情令到佢觉得自己好似错过咗18个月享受足球嘅日子。」至於最大一个原因,可能系因为利物浦对佢嘅关怀同照料。
高普妈妈去年年初过身,佢遗憾地未能见到母亲最後一面,当时球会给予佢最大嘅支持,令高普觉得呢间球会真系关心佢,因此想留低继续报效球队。
由於呢啲原因,高普亲自打电话畀经纪人,吩咐佢同管理层主动倾续约。据悉,佢今次续约只系延长合同,但冇加到人工,反而争取为佢嘅教练团成员加薪250万欧元,而助手们将继续同佢一齐合作,直到合同结束。