宾福特自1月签入丹麦中场基斯甸艾历臣後,球队成绩直线上升,呢位「中场发电机」嘅表现亦获一致好评,据报热刺、纽卡素甚至曼联都想喺今夏签佢。不过英国传媒报道,基斯甸艾历臣近日同女友喺西伦敦为囝囝搵学校,似乎预示佢会继续留效宾福特。
基斯甸艾历臣1月以自由身签约宾福特至季尾,短时间之内已证明自己未受心脏问题影响,踢番昔日嘅高水平表现,热刺领队干地早前就曾公开表示想同佢再度合作,唔少人都预计呢位丹麦中场会转投更大规模嘅球会。
英国《每日快报》爆料,宾福特留人计划有机会实现,基斯甸艾历臣近日同女友Sabrina Kvist喺西伦敦嘅Chiswick,为就快4岁嘅大仔搵学校,地点同宾福特基地以及佢哋住紧嘅地方好接近,消息指基斯甸艾历臣一家四口亦好适应目前生活,加上依家喺宾福特有出色表现,有机会选择继续留低。