曼联落实下季由坦哈格执教後，看守领队兰历克亦会照原定安排升任顾问，不过据英国传媒报道，兰历克日内就会落实出任奥地利国家队领队，并以兼职身份继续出任「红魔鬼」顾问。兰历克喺对车路士赛後亦表明，同曼联倾好嘅协议，系容许佢同时接其他工作。
奥地利《信使报》周四(28日)率先爆料，话兰历克已非常接近成为奥地利国家队主帅，喺曼联1比1逼和车路士後，兰历克亦作出强烈暗示：「今场系关於车路士，希望你哋问番关於场波嘅问题。我唯一可以肯定咁答你，系我未来2年会继续曼联顾问嘅工作，亦非常期待。冇错，我系有空间接其他工作，呢样系上年11月我同曼联倾好咗。」
据报兰历克同曼联嘅2年顾问合约，要求佢每个月返6日工，令佢有大把时间去教另一支球队。兰历克曾经做过奥地利班霸萨尔斯堡嘅总监，同奥地利足球非常熟悉，亦系奥地利足总睇中兰历克嘅主因，消息指足总周五(29日)会举行高层会议，预料会正式拍板聘请兰历克，取代上月辞职嘅德国籍领队科达。
曼联名宿加利尼维利对於兰历克「兼职」表示质疑：「曼联顾问，真系可以每个星期考察奥地利球员表现？奥地利系支好好嘅球队，9月、10月、11月同出年3月都有国际赛，究竟兰历克会优先做曼联顾问定系教奥地利？当中有利益冲突，我睇唔到身兼两职嘅做法点样行得通。」
